یہ داستان ایک پراسرار اور انتقامی ناگن (شکنتلا) اور ناگ (ارجن) کی ہے جو سو سال کی انسانی قربانیوں کی رسم کے بعد انسانی روپ دھارتے ہیں۔ ایک جوگی اور اس کے لالچی چیلے صابو کے ہاتھوں ناگ دیوتا کے مندر میں آخری قربانی کے بعد یہ جوڑا انسان بن جاتا ہے۔ صابو، جو جوگی کو قتل کر کے ان ناگوں کو اپنا غلام بنانا چاہتا تھا، خود ناگ اور ناگن کا پہلا شکار بن جاتا ہے اور دونوں اس کا خون پی کر اپنی انسانی جوانی قائم رکھتے ہیں۔
اس کے بعد ارجن اور شکنتلا مختلف روپ بدلتے ہوئے انسانی دنیا میں قدم رکھتے ہیں۔ ایک گاؤں میں رندھیر نامی شخص سے ان کا سامنا ہوتا ہے۔ رندھیر شکنتلا کی خوبصورتی پر نیت خراب کر لیتا ہے، جس پر شکنتلا ناگن کا روپ دھار کر وہاں سے نکلتی ہے۔ اس دوران گاؤں والے ارجن (ناگ) کو گھیر کر تیل ڈال کر زندہ جلا دیتے ہیں۔
اپنے محبوب ارجن کے اس دردناک انجام کو دیکھ کر شکنتلا انتقام کی آگ میں جل اٹھتی ہے۔ وہ گاؤں والوں کو تباہ کرنے کی دھمکی دے کر بھاگتی ہے، جہاں راستے میں اسے ریاست تابانہ کے مہاراجہ رام ناتھ کا شاہی قافلہ ملتا ہے۔ شکنتلا مکر و فریب اور اپنے بے پناہ حسن کے سحر سے مہاراجہ کو اپنے جال میں پھنسا لیتی ہے اور خود کو مظلوم ثابت کر کے شاہی محل تک پہنچ جاتی ہے۔ دیکھتے ہی دیکھتے وہ مہاراجہ رام ناتھ سے شادی کر کے ریاست تابانہ کی نئی ملکہ اور مہارانی بن جاتی ہے اور محل کے اندر اپنے اقتدار اور اختیارات کی دھاک بٹھا دیتی ہے۔۔۔۔۔۔۔۔۔۔۔۔۔۔۔۔۔۔۔۔
No comments:
Post a Comment
Note: Only a member of this blog may post a comment.